UP CM-in cabinet minister pali a ban

Uttar Pradesh-a rorellai, Samajwai Party chhung buaina kal zelah, Chief Minister Akhilesh Yadav chuan nimin khan a minister pali a ban a, an zingah hian a pu Shivdal Yadav pawh a tel.

Minister aṭanga ban takte hi Shivdal Yadav bakah Narad Rai, Om Prakash, Shadab Fatima, Gayatri Prasad Prajapati-te an ni. Heng mi pathumte hi Shivdal Yadav-a nena inhnaih tak takte nia sawi an ni. Jaya Prada chu UP Film Development Council vice president post aṭangin ban a ni bawk.

Nakkuma Assembly inthlan hmachhawn tur, Uttar Pradesh-a rorellai party SP hi phel mai thei dinhmunah a ding mek nia sawi a ni. SP hotu lu ber, Mulayam Singh Yadav leh a fapa, CM Akhilesh Yadav-te inkarah harsatna a awm a, hei hi an chinfel thuai loh chuan an party hi an phel ngei rin a ni. Nimin khan Mulayam Yadav leh Shivdal Yadav-te chuan Lucknow-ah meeting an nei.

Party chhunga buaina inṭan chhan hi an party chhuahsan tawhtu, Amar Singh-a lakluh leh a nih chungchangah a ni a, party-a lakluha chanvo pawimawh pek leh hi CM bakak hruaitu dang, Ram Gopal Yadav leh Azam Khan-te'n an dodal nasa hle. Hemi hnu hian Quami Ekta Dal leh SP inchhunfin a, state president atan Akhilesh Yadav thlak a, Shival Yadav dah a nih vangin an buai zual a ni.

SP hian tunhma lama buaina an neih chuan Mulamyam Singh Yadav hian a chingfel thei mai zel a, mahse tun ṭum an buaina tawhah hian CM Akhilesh chuan a pa ngei hi a dodal a ni. Ram Gopal Yadav leh party MLA leh MP tam zawkin an thlawp avangin, CM chuan a pa lak aṭanga inlakhran hi a hreh tawh lo nia sawi a ni.