Lalu-a'n politics khelhna atan sipaite hmang lo turin ti

Rashtriya Janata Dal (RJD) party hruaitu, Lalu Prasad Yadav chuan BJP leh Maharashtra Navnirman Sena (MNS) te chu politics khelhna hmanruaah sipaite hmang lo turin a ti.

Tunhnaiah MNS hotu Raj Thackeray hian Maharashtra CM Devender Fadnavis leh filmmakter Karan Johar-te chuan meeting an nei a, meting-ah hian MNS-in Karan Johar-a film tihchhuah tum, 'Ae Dil Hai Mushkil' an dan sak chungchangah inremna an siam nia sawi a ni. He film-ah hian Pakistan actor, Fawad Khan a tel avangin MNS hian a dodal a ni. MNS chuan an film-a Pakistan actor hmang tu, producer-te chuan Indian Army Relief Fund atan cheng vaibelchhe 5 an pe tur a ni, a ti.

Lalu chuan MNS hotu chu sawiselin, sipaite chhuanlamah hmanga vote zawng an awm thu a sawi. BJP pawh Uttar Pradesh inthlan neih turah Indian Army-te'n surgical strike an neih chu vote zawnna hmanrua atan an hmang niin a sawi bawk.

Hetih lai hian army official-te chuan MNS hotu, Thackeray-a'n army-te puala producer-te hnena sum pe tura a rawtna siam chu an hnawl. Sipai hotute chuan army welfare fund tana sum pekte chu mahni duhthu ngeia an thawh a ni tur a ni tiin, tihluihna hmanga sum pek tir chu an duh loh tih an sawi. Politics thila hnuhluh tel an ni chu pawi an ti hle tih sawiin, MNS hmalak tum dan chu an thlawp dawn lo tih an sawi.