India aiawhten Moscow an thleng

Political party hrang hrang MP thlan chhuah, India aiawha Global anti-terror outreach campaign neia zin chhuak hmasa ber, DMK MP Kanimozhi Karunanidhi kaihhruai team chuan Ningani zan khan Russia khawpui Moscow an thleng fel ta.

Karunandhi team hian ram panga an tlawh dawn a, India-in ramri pela firfiak pawl chetna a dodal chungchang leh Operation Sindoor kalpui a nihna chhan hrilhfiahna hun an hmang dawn a ni.

He hmalakna hi Pahalgam-a firfiak pawl beihna chhuak vanga mi 26 thihna thlengin a nghawng chhuah zel niin, sorkar laipui chuan ram hrang hrang hnenah firfiak pawl dodalna campaign neih hi a ruahman a ni. India aiawhte hian nimin Zirtawpni khan Russian Parliament, Duma leh foreign ministry official-te nen in kawmna hun an nei zui nghal a ni. India aiawhte hi India ambassador Vinay Kumar leh official dang eng emaw zatin Domodedovo International Airport-ah an lo hmuak.

MP zinchhuakte hian Slovenia an pan leh hmain, vawiin Inrinni hian Russia tualchhung thuthar lakhawm tute nen in kawmna hun an hmang ang. Slovenia bakah Greece, Latvia leh Spain te an tlawh nghal dawn bawk.

Pahalgam firfiak pawl beihna chhuah hnu khan PM Modi chuan "new normal" puangin ramri pela firfiak pawl chetna chu India laka indo puannaa ngaih a nih tawh tur thu a lo sawi lawk tawh a ni.