Afghanistan mite tan India visa dil leh thei ta

India chuan kum nga chhung Afghanistan mite tana visa eng chi pawh pek chhuah a tih tawp hnuah leh, embassy leh consulate-te a kharsak vek hnuah Afghan mite tan visa hrang hrang pek chhuah a remti leh ta niin sorkar thuchhuah chuan a tarlang.

Sorkar laipui chuan official-in Afghan mite tana visa pek chhuah a nih leh tawh thu puangzar lo mah se, visa buaipuina online portal-ah te "New AFGHAN Visa" tih chu a awm thar a, hemi kaltlang hian Afghan mite chuan online in visa-te an dil leh thei tawh dawn a ni.

India visa online portal aṭanga a lan danin, visa dil theih category tarlanah hian zirlai, sumdawng, medical, medical attendant, entry leh UN diplomat-te tan dil theih niin a lang. Visa dil tura kaihhruaina an siamah hian Passport and National Identity Card (Tazkira) leh mahni nihna kimchang tarlanna turte dah tel a ni bawk.

Visa dil theih dan leh dil thei chin hrang hrangah hian duhdan leh mamawh dan ang zelin dil dan kawng hmang siam a ni bawk. Heng kaltlang hian visa mamawh dan ang zelin dilna hi siam theih a ni a, a dilna tur a zirin hmalak dan leh a kalphung a in ang lo ṭheuh bawk a ni.