J&K CM-in Pahalgam-ah cabinet meeting ko

Jammu and Kashmir chief minister Omar Abdullah chuan Pahalgam-a firfiak beihna a thlen hnuah, Kashmir huam chhunga khualzinte hiptu hmun hrang hrangte a reh tak duak avangin hma lak dan tur ngaihtuah a, sawi ho turin nimin khan Pahalgam-ah cabinet meeting a ko.

J&K sorkar tharin summer capital, Srinagar leh winter capital, Jammu pawn lama cabinet meeting a neihna hmasa ber a ni. Pahalgam-a meeting huaihawt hian khualzinte tlawh tam hmunte tuai thar bakah, henglai hmunte tana inrintawkna siam thar leh chu a tum a ni. Hei bakah khualzinte tan pawh tlawh a him tawk tih lantir tumna pakhat a ni bawk.

CM leh a cabinet member-te hian Pahalgam-a tourism stakeholder-te pawh kawmin, khualzin hip thei tura hma lak dan turte an sawipui dawn a ni. Firfiak pawl beihna thlen hnu hian J&K-ah khualzin lut an tlem phah hle a, hotel hrang hrang pawhin mikhual thlen tur mumal an nei lo nia sawi a ni.

Pahalgam-a meeting neih zawhah, vawiin hian CM chuan Kashmir hmar lama awm, khawvel hriata lar ski resort awmna Gulmarg-ah official meeting a kaihruai leh dawn a ni. Meeting-ah hian state chhunga mi pawimawh tak tak cabinet minister-te, Advisor to CM, chief secretary, department hotute,civil leh police official-te an tel ang.