Jharkhand-ah Maoists top commander kap hlum

Jharkhand Jaguar leh Palamu Police thawk dunin operation an kalpuinaah, nimin Thawhlehni khan Maoists commander Tulsi Bhuinya chu Palamu district-ah an kap hlum. Inrinni liam ta khan Maoists mi pahnih bakah Jharkhand Jan Mukti Parishad (JJMP) hruaitu lawk Suryadev Lohra te chu kah hlum an lo ni tawh bawk.

Maoists helpawl hruaitu Bhuinya bakah hian a ṭhuihhruai pahnih, Nitesh Yadav, a lu man Rs nuai 15 leh sanjay Godram luman Rs nuai 10 nei te chu thi zingah hian an tel niin Palamu police chuan an tarlang.

Thawhṭanni khan Latehar police chuan helpawl mi leh sa, Manish Yadav luman Rs nuai 5 nei chu an kah hlum bakah mi dang pakhat an man bawk.

Police chuan intelligence lam aṭanga thu an dawn bawhzuia beihpui hi thlak an nih thu an sawi. Nitesh Yadav leh a ṭhuihruaite hian Hussainabad, Mohammadganj leh Haidernagar ramri bawrah pawikhawihna lian tham thlen an tum tih thu an dawn avangin Palamu police leh Jharkhand Jaguar-te chu an che chhuak tih an tarlang. An inbeihnaah hian ralthuam eng emaw zat an man tel bawk a ni.