Bengaluru-ah University of Liverpool campus hawng dawn

UK-a University of Liverpool chuan University Grants Commission (UGC) chuan Bengaluru-ah campus hawn a phalsak a, he phalna Letter of Intent (LoI) hi Thawhṭanni khan New Delhi-ah union education minister Dharmendra Pradhan chuan a hlan.

University of Liverpool hi UGC Regulation, 2023 hnuaiah ramdang zirna in sang zinga India rama campus hawn phalsak pahnihna niin, hemi hma hian University of Southampton chu phalna pek a lo ni tawh bawk. Anni hian August thla aṭangin Gurugram-a Sector 20-a campus an siamah zirna hi an kalpui ṭan dawn a ni.

Minister Pradhan chuan LoI chu khawvel huapa zirna in sang ṭha tak tak ten India-a rinna an nghah ngam zia ti langtu a nih thu sawiin, India in khawvel ramdang nena zirna huanga thuk zawk a thawhpuina kawnga mellung pawimawh tak a ni, a ti bawk. Heng hmalakna te hi National Education Policy, 2020 in a lo ruahman tawh tih hlawhtlinna pakhat a nih thu a tarlang.

Minister chuan University of Liverpool chu STEM kaihhnawih zirchianna leh tih hmasawnna tur lamah a in sawrbing dawn tih a sawi. STEMB (Science, Technology, Engineering, Medicine, and Business) ti thei, ramdang zirna in sang 15 chu India-ah an rawn luh belh dawn thu a tarlang bawk a ni. Australian university pahnih - Deakin University leh University of Wollongong pawhin Gujarat-a Indian campus an siamah zirna an kalpui tawh bawk a, mahse UGC hnuaiah awm loin International Financial Services Centres Authority hnuaiah an awm thung.

Liverpool Univesity-ah hian business management, accounting and finance, computer science, leh biomedical sciences-te a zir theih dawn a, hei bakah hian game design programme chu a awm dawn bawk.