Pahalgam beih chungchangah INDIA bloc-in special session neih duh

Eptu ṭangrual pawl, INDIA bloc chuan Pahalgam-a firfiak beihna leh, hemi hnuah thil thleng chungchang sawi ho tura Parliament special session neih an duh a, sorkar laipui hnenah ngenna theh luh an tum.

Eptu pawl hrang hrang - Congress, Trinamool Congress leh Rashtriya Janata Dal (RJD) chuan party mal angin Pahalgam chungchang special session neih an duh thu hi an lo sawi tawh a ni. Mahse, party mal ang ni loin ṭangrual pawl angin sorkar hnenah joint appeal hi thlen an tum a,an ngenna theh luh tur hi an duang mek a ni.

Independent MP Kapil Sibal chuan Pahalgam beih a nih aṭanga a ni thumna, April 25 khan sorkar laipui hnenah firfiakte beihna an tawh laia India inlungrual leh inpumkhatna lantir tura Parliament special session ko tur hian a lo ngen tawh a ni. A hnuah RJD leh Congress pawhin ziakin sorkarah ngenna hi an thlen ve leh bawk.

Eptu pawl chuan, "April 22, 2025-a Pahalgam beih a nih leh, he thil thlengin ramchhung leh ram pawn thleng nghawng a neih dan sawi ho turin sorkar chuan special session hi a koh ngei a ngai a ni. Tlang takin ngenna hi kan siam a, sorkar pawhin harsatna a siam lo turah kan ngai," tiin an tarlang.

Firfiakte pawikhawihna thlen chhan letna kawnga sorkar hmalakna hrang hrangte chu eptute hian an thlawp tlat thu pawh an lo sawi tawh a; tunah pawh firfiakte beihna a chhan let dan leh firfiak dona kawnga a hma lak dan ram hrang hrang hnena hrilhfiah turin party hrang hrang MP-te an feh chhuak mek a ni.

Lok Sabha-a leader of opposition, Rahul Gandhi leh Trinamool MP-te chuan Operation Sindoor kalpui a nih hnuah Pakistan sipaiten an rawn beih let tuartu, Jammu and Kashmir-a Poonch leh Rajouri khuate an lo tlawh tawh bawk.