PM Modi-a'n state 4 a tlawh kual dawn

Prime minister Narendra Modi chu ni hnih chama state pali - Sikkim, West Bengal, Bihar leh Uttar Pradesh tlawh turin vawiin hian a zin chhuak dawn a, a zinnaah hian development project hrang hrang a hawng ang.

Prime Minister hian Sikkim kal hmasa berin state-in kum 50 a tlin lawmna a hmanpui dawn a, development project hawngin lungphum a phum dawn bawk. Sikkim hian an state kum 50 tlin lawmna hi “Sunaulo, Samriddha and Samarth Sikkim” tih thupui hmangin kum tluana neih a tum a ni. Modi hian Sikkim aṭangin West Bengal a pan ang a,Alipurduar leh Cooch Bihar-ah City Gas Distribution project lungphum phumin tlai lamah Bihar-ah Rs vbc 1,200 senga siam Patna Airport new terminal building thar a hawng ang. Sikkim-a project a hawn tur zingah hian khum 500 awmna tur, Namchi-a Rs vbc 750 senga siam tur district hospital leh Sangachoeling-a passenger ropeway a tel a, Gangtok-ah prime minister hlui Atal Bihari Vajpayee lim a hawng bawk ang.

Zirtawpni hian Karakat, Bihar-ah Rs vbc 48,520 hu development project lungphum a phum dawn a, heng zingah hian Nabinagar Super Thermal Power Project, Stage-II (3x800 MW) pawh a tel; PM hian vantlang inkhawmah thu a sawi dawn bawk a ni. Uttar Pradesh tlawh hnuhnung berin, Zirtawpniah Kanpur Nagar-ah Rs vbc 20,900 hu development project a hawng dawn a, vantlang inkhawm buatsaih a ni dawn bawk.

PM hian Rajasthan leh Gujarat pawh a tlawh tawh a, June 9-ah a term thumna atana PM atana lakluh a nih champha a thlen hmain state pawh tlawh chhunzawm zel a tum.