NDA aṭanga hmeichhe batch graduate hmasa ber chhuak

Indian Army, Navy leh Air Force-a officer-te chher chhuaktu, National Defence Academy (NDA), Pune aṭangin female cadet batch hmasa ber 17-te chu an graduate ta a, nimin khan mipa cadet 300 chuang rualin degree hlan an ni.

NDA Commandant Vice-Admiral Gurcharan Singh chuan hmeichhe cadet graduate hmasa ber an chhuak thei dawn ta chu ram tana thil chhinchhiah tlak a ni tih sawiin, a lawmpui thu a sawi. An service-naah pawh hruaitu ṭha tak nia an hming an chher chhoh ngei a duh thu sawiin duhsakna a hlan.

148th NDA course convocation ceremony hi academy-ah neih a ni a, Delhi-a Jawaharlal Nehru University (JNU) aṭangin cadet 399 hnenah degree hi hlan a ni. An zinga 84 chu BSc degree hlan niin mi 85 hnenah Computer Science degree, 59 hnenah Bachelor of Arts (BA) degree leh 111 hnenah BTech degree hlan a ni.