Lockdown chhungin inthlahdul a ni lo ang : Arvind Kejriwal
Delhi chief minister Arvind Kejriwal chuan nimin khan press conference a neihnaah lockdown chhungin inthlahdulna engmah a awm dawn lo, a ti.
"Thuneitute chuan lockdown hi Delhi-ah hian khauh takin an kalpui zel dawn a, India ram khawpui hrang hrang zingah Delhi hi Covid-19 hri kai tamna ber a ni. Chuvang chuan khuahkhirhna bial (containment zone) pawh kan puan belh zel ka ring," tiin Kejriwal chuan media-te hmaah a sawi.
Tunah hian Delhi-a hmun 77 chu containment zone-a puan a ni tawh a, Delhi a district zawng zawng pawh hotspot-a puan vek a ni tawh bawk a ni. Delhi sorkar hmalaknate chu April 27-ah ennawnna an nei dawn tih Kejriwal chuan a sawi bawk.
April 18 khan Delhi-ah hian mi 736 chu Covid test neih a ni a, chung zinga mi 186-te chu an positive a ni. Mahse heng postive-te hi hri natna lanchhuahna an mahniah a awm lo thung. Hei vang hian Kejriwal chuan an bial chhungah eng anga tamin nge hri kai hi an la awm belh zel ang tih a hriat loh thu a sawi.
Heng mi 186-te hi Delhi sorkar hnuaia food distribution centre-a thawkte an ni a, helai hmuna thawk mi dangte pawh a rang thei ang ber test tir vek tura tih an ni. India rama Covid-19 hri kai zinga 12% chu Delhi aṭangin a ni.