Damdawia inphuhin taksa leh rilru lamah harsatna thlen thei

Covid-19 hri kai tur venna atana damdawi hmanga mihring phuh chuan an taksa leh rilru lam thlengin harsatna a thlen thei tih Union Health Ministry chuan a tarlang. 

Miin Covid-19 a kai chuan, damdawi hmanga a taksa pawn lam phuh ringawt chuan a taksa chhunga kai tawh chu a that chuang lo tih ministty chuan a sawi. Hri kai venna tura thawmhnaw leh taksa disinfectant hmanga phuh chuan a that tih finfiahna engmah a awm lo tih a sawi bawk. 

Ministry chuan mihring taksaa sodium hypochlorite phuh chu hri venna atan a ṭha em tih zawhna an dawng fo tih sawiin, hmun ṭhen­khatah mihring phuh pawh an lo awm tawh a ni, a ti. Disinfectant chu mihring phuhna tur ni loin, Covid-19 kai leh a kai ni rinhlelhten awmna hmun leh an  thil khawih ṭhinte tihfaina atan hman zawk tur a ni, a ti. 

Thil tihfaina tura disinfectant hman dawn pawhin fimkhur a ngai hle tih a sawi a, kutkawr te bun ngei tur a ni, a ti. Damdawi engpawh hmanga mihring phuh chu eng kawng mahin a ṭha lo a, an vun leh mit lamah harsatna a thlen a, an  hip luh phei chuan thawk lamah harsatna a thlen thei a ni. Hei bakah an rilru thleng pawhin nghawng ṭha lo tak a nei thei a ni, tiin ministry chuan a tarlang.