Covid-19 case 14,378 zinga 4,291 chu Delhi Markaz Event nen a inzawm: Sorkar laipui

Sorkar laipui data aṭanga a lan danin Inrinni zan thleng khan ram puma coronvirus kai tawh chu mi 14,792 an ni. Inrinni zing khan hri kai hi 14,378 a la ni thung a, ni khat chhung leka a punna hi a tam hle.

Union Health Ministry chuan heng case zinga 4,291 chu Delhi-a March thlaa neih Markaz event nen khan an inzawm tih a sawi.

Inrinniah ringawt khan mi 488-in hrileng hi an kai tih hriatchhuah belh a ni a, Health Ministry joint secretary Lav Agarwal chuan rampuma Covid-19 case awm zawng zawng aṭanga 29.8% chu Tablighi Jamaat congregation nen a inkaihhnawih a ni, a ti.

Tamil Nadu-ah chuan case awm zawng zawng zinga 84% chu Markaz event nena inzawm  a nih thu hi a sawi a, Telangana-ah chuan 79% niin, Delhi 63%, Uttar Pradesh 59% leh Andhra Pradesh 61%-te a nih thu a sawi a ni. Heng a sawilante hi case tamna a ni a, case nei tlem zawk state-ah te pawh Markaz event nena inzawm case hi a awm nual tih a sawi bawk.

Arunachal Pradesh-a case awm chhun pawh he event nena inzawmna nei hi a ni a, Assam-a case 35 zinga 32 chu ni bawkin Andaman and Nicobar Islands-a case 12 zinga 10 chu a ni bawk niin a sawi.

"He thu ka sawi chhuah chhan hi engdang ni loin mi pakhatin inkaihhruaina dan zawm lo a, social distancing leh lockdown a zawm ṭhat loh avanga rampumin a tawrh theih zia ka sawi duh vang a ni," a ti.

India rama Covid-19 case mortaility rate chu 3.3% chiah a ni a, thi tawh zinga 14.4% chu kum 45 hnuai lam niin, 10.3% chu kum 45-60 inkar an ni. 33.1% chu kum 60-75 inkar an nih laiin 42.2% chu kum 75 chunglam an nih thu a sawi bawk.

 "Hripui vanga thi tawh zawng zawng aṭanga 75.3% chu kum 60 chunglam an ni a, 83% chu damlohna nei sa an ni," tiin, Agarwal chuan kum upa lam leh hrisel lohna neisate tan chuan fimkhur a ngai zual hle tih a sawi a ni.