Maharashtra CMRF tan foreign fund dawn phalsak

Union Ministry of Home Affairs chuan Foreign Contribution (regulation) Act (FCRA) 2010 hnuaia inziak lut, Maharashtra Chief Minister Relief Fund tan ramdang aṭanga puihna dawn a phalsak. Maharashtra hi ram chhunga state zingah ramdang aṭanga puihna dawn phalsak hmasa ber a ni bawk.

Ram dang aṭanga sum hmanga puihna hrang hrang dawng thei tur hian Maharashtra Chief Minister’s Relief Fund (CMRF) hian Bombay Public Trust Act, 1950 hnuaiah an a inziaklut tih tarlan a ni. CMRF a sum lut reng reng hi state CM kaihhruaina hnuaiah enkawl niin, a hmanna zawng zawng pawh CM kaihhruai hian thunun vek a ni bawk. CMRF-ah hian kumtin Rs nuai 1 aṭanga nuai 1.5 sum che vel awm ṭhin angin an tarlang.

State sorkar hnuaiah CMRF ah hian mi in phal leh tualchhunga mi ṭhahnem ngaite aṭangin sum hi thawhkhawm ṭhin a ni. Heng sum tlingkhawm hi khuarel chhiatna leh vantlang buaina, firfiak pawl pawikhawihna, damdawi lam in enkawlna leh zirna huanga puih mamawhte tana puihna tura ruahman a ni. Mahse ram dang aṭanga sum hmanga puihnate dawng thei tur hian Foreign Contribution (Regulation) Act (FCRA), 2010 hnuaiah in ziah luh vek a ngai thung.

Ram dang aṭanga puihna dawn theihna dang, Prime Minister Citizen Assistance and Relief in Emergency Situations Fund March 2020 chu Covid-19 hri len aṭang khan harsatna awmte chhawk zangkhaina tura duan chhuah niin hemi huang atan bik hian FCRA kaihhruaina erawh hman ve a ni lo.