Pakistan tana enthlatu mi 2 man belh leh

Punjab leh Rajasthan huam chhunga cheng mi pahnih chu nimin khan Pakistan tana enthlak hna an thawh vangin man an ni. An pahnih hian India sipaiten Operation Sindoor an kalpuina chungchang thuruk chu Pakistan Intelligence operative hnenah an hlan niin official chuan an tarlang.

Punjab mi an man hi Gagandeep Singh niin Mohalla Rodupur, Tarn Taran district huam chhunga cheng a nih thu Director General of Police Gauarv Yadav chuan a sawi. Rajasthan mi an man hi Shakur Khan niin, Employment Office, Jaisalmer-a assistant administrative hna thawk lai a ni. Police lam tarlan danin Gagandeep Singh kut aṭang hian Pakistan Intelligence Operative(PIO) hnena thuruk a thawn awmna mobile phone an man tel a ni. Khan erawh hun rei tak aṭang tawha enthlak a nih thu Inspector General of Police (CID Security) Vishnu Kant Gupta chuan a sawi.

Gagandeep Singh hian Pakistan Intelligence agency Inter-Service Intelligence (ISI) nen an in biak pawp reng thu leh, thuruk a thawnte vang hian pawisa eng emaw zat a dawn thu a sawi. Shakur Khan hi Assistant Administrative Officer hna Jaisalmer-a thawk a nih vangin awlsam takin document hrang hrang a khawih theih te chu ti chingpenin, Pakistan hnenah tualchhung himna chungchang kalpui dan hrang hrangte a thawn ṭhin niin an tarlang bawk.

Police lam chuan pawisa hlawha enthlak hna thawktute chhuichian hna hi an kalpui chhunzawm reng tih DGP chuan a sawi. Tun hnaiah police-te hian enthlak hna thawk tu mi pariat an lo man tawh a ni.