Akhilesh-a'n Samajwadi Party chhuahsan a tum lo A pa duh dan a nih chuan CM aṭanga ban a remti
Uttar Pradesh-a rorellai, Samajwadi Party chhunga buaina awm mek chinfel dan ngaihtuahin nimin khan party headquarters-ah party MP, MLA leh hruaitu pawimawhten meeting an nei. Chief Minister Akhilesh Yadav-a chuan an party hotu lu ber leh a pa, Mulayam Singh Yadav-a duh dan a nih chuan CM a nihna aṭanga ban a remtih thu a sawi.
Meeting neihnaah hian CM-in cabinet minister aṭanga a ban tak, a pa unau ni bawk Shivpal Singh Yadav pawh a tel. Akhilesh chuan party chhunga buaina an neih mek avanga party thar din tur anga an sawi chu thu dik lo a nih thu a sawi a, "State mipuite tan ka theihtawp ka chhuah a, ka pa hi ka tan chuan zirtirtu ropui a ni" tiin, a pa chu a duh ang tak chief minister atana dah turin a ti. Hemi rual hian kum 43 mi, Akhilesh chuan party chhungah amah phiarrutu an awm tih sawiin, an zingah chuan Shivpal pawh chu a tel a ni, a ti.
"Kan party ṭhatna tur leh sorkarin Uttar Pradesh-a hmasawnna a thlenna turin theihtawpin ka thawk a, ka thawk chhunzawm zel dawn a ni" a ti a, a kaihhruai sorkarin state tana hmasawnna project hrang hrang a thawhte a sawilang bawk.
Samajwadi Party buaina inṭanna hi an party chhuahsana party thar dintu, Amar Singh lakluh a ni leh hnuah chanvo pawimawh pek tum chungchangah a ni. Akhilesh leh amah thlawptute chuan Amar Singh-a chu dinhmun pawimawh chelh tura dah leh nghal an duh lo a, hetihlai hian party hruaitu hlun zingah Amar Singh thlawptu lam eng emaw an awm. Akhilesh hian a cabinet zinga Shivpal-a lamṭangte a ban avangin party buaina hian zuallam a pan a, hei vang hian Mulayam Singh chuan nimin khan meeting hi a ko ta a ni.