Rajiv Gandhi-a thattuin NCW-ah ngenna thlen

Prime Minister hlui Rajiv Gandhi-a thattu zinga mi Nalini Sriharan-i chuan chhuah zalen a nih theihna tura inrawlh turin, National Commission for Women hnenah ngenna a thlen.

Nalini ukil P Pugazhenthi chuan, "Nalini hi hmeichhe tang zingah tang rei ber a ni a, NCW hnenah chhuah a ni theih nan ngenna a thlen a ni. Tamil Nadu sorkar hian constitutional provision hmang ni se chhuah a ni tawh ang. Mahse Criminial Procedure Code provision an hmang zawk a ni", a ti.

Pugazhenthi chuan National Commission for Women inrawlh leh hmalakna avangin kum 2000 khan Sriharan-i hnena thi tura hremna pek chu damchhung lung-in tang tura tihnep sak a nih thu a sawi.

NCW hnena lehkha a thawnah, Nalini chuan kum 25 a tan tawh thu sawiin,
ṭap loa ni a hmanral a la awm lo tih a sawi a, hmeichhe nunphung pangngai anga a nun ve theih loh thu a sawi. Ni pawimawh bika state sorkarin hmeichhe tang za tel a chhuah zalen laiin, chhuah a nih ve ngai loh avangin a beidawng thei hle tih a sawi bawk.

"Tamil Nadu-in release scheme a siam hrang hrang hnuaiah chhuah zalen theih ka nihna a rei tawh a, mahse tun thlengin chhuah ka la ni ve lo. Hei vang hian ka beiseina pawh a bo ṭep tawh a ni" a ti. Nalini pasal, Sriharna pawh damchhung tang tura hrem a ni bawk a ni. Nalini chuan a fanu, UK-a awm mek chu a hmuh chak thu a ziak lang bawk.

Nalini hi kum 1991, June 14 khan PM hlui Rajiv Gandhi thahttua puhin man a ni a, kum 1998 khan special court chuan amah leh midang 25-te chu thiam loh chantirin thi turin an chungthu a relsak a ni.