Ramchhung Lawrkhawm

Goa-ah facility siam turin Rafale supplier ngen

France ram hnen aṭanga Rafale fighter jet leina tura supplier atan thlan, France rama Safran group chu Goa-ah manufacturing facility siam turin ngen a ni tih Defence Minister Manohar Parrikar chuan a sawi.

North Goa-a Sattari hmuna helicopter maintenance and repair centre a hawnnaah, Parrikar chuan he thu hi a sawi a, Safran group peng pakhat, Flacma chuan Rafale jet fighter siamna tur hmanrua 20-25% vel a supply ṭhin tih a sawi a, hei vang hian he company hi Goa-ah hmun nei tura ngen an ni, a ti. Defence Miniter chuan Rafale jet fighter leina tura cheng vaibelchhe 59,000 inremna an siam aṭangin, cheng vaibelchhe 30,000 chu hmanraw leina atan hman a ni dawn a ni, a ti.

LoC-ah sipaite inkap

India leh Pakistan sipaite chu Pathianni zan khan Jammu and Kashmir, Jammu distirct-a Line of Control (LoC) ah an inkap.

Police-te chuan ram pahnih sipaite hi Kanachak, Akhnoor, Arnia leh international border hmun dangah zankhuain an inkap niin an sawi. Pakistan Ranger-te chuan silai hmetpuak hmasain, Pathianni zan dar sarih vel khan Indian post-te an rawn kap a, hei hi sipaiten an chhang let ve nghal a ni.

Ramria inkahna thleng vang hian ramri bul khuaa chengte pawh zankhuain mu thei loin an awm phah a, Pakistan aṭanga laipui an rawn kah chuan an thlai chinna ramte a tichhe tel nia sawi a ni. District thuneitute chuan sipaite inkahna thlengin civil mite hmun a tihchhiat dante enfiah a nih tur thu an sawi.

Union Minister-in Hindu-te pungchak turin a fuih

Union Minister Giriraj Singh chuan Hindu-te chu pung chak turin a fuih a, Hindu an pun zel loh chuan Ram temple pawh din theih a ni lo ang, a ti.

Minister chuan ramchhunga state pariata Hindu awm zat chu an tlahniam zel tih sawiin, hei vang hian an pun chak a ngai a ni, a ti. Singh chuan, "India leh Pakistan ṭhen a nih khan Pakistan ramah Hindu 22% an awm a, tunah hian Hindu awm zat kiamna hi 1% chauh a ni. Mahse India-ah chuan Hindu awm zat 90% niin, Muslim 10% an awm. Mahse tunah chuan Muslim awm zat chu 24% zetin an pung tawh a, Hindu awm zat erawh 76% ah a tla thla tawh a ni", a ti.