Akhilesh-a'n minister bante dah let leh dawn

Uttar Pradesh-a rorellai, Samajwadi Party chhung buaina chinfel dan kawng zawnga Thawhṭanni-a party MP, MLA leh hruaituten meeting an neih hnuah, Chief Minister Akhilesh Yadav chuan cabinet minister aṭanga a ban takte minister-ah a dah let leh dawn a, an zingah hian a pa unau, Shivpal Yadav pawh a tel.

SP chhungah hian Akhilesh Yadav thlawptu leh Amar Singh thlawptute inkarah inhriatthiam lohna nasa tak a awm a, CM hian a minister zinga Amar Singh thlawptu mi pali-te chu Pathianni khan a lo ban tawh a ni. Minister ban an nih vang hian Akhilesh-a rinrawl ber, a laichin Ram Gopal Ydav chu Samajwadi party aṭangin hnawhchhuah a ni vel nghal a ni.

Party chhung buainain zual lam a pan zel avangin Thawhṭanni khan SP hotu lu ber, Akhilesh Yadav-a pa, Mulayam Singh Yadav chuan meeting hi a ko a, a hnuah a chenna inah Akhilesh leh Shivpal-te hi a hmu leh bawk. Meeting-ah hian a tir lamah in hnial buai hle mah se, Akhilesh-a lamṭang leh Shivpal-a lamṭangte hian a tawpah ṭha takin thu an sawiho thei a ni.

Mulayam Singh chuan Akhilesh leh Shivpal-te chu an inkarah harsatna an neihte theihngilh turin a hrilh a, UP CM aṭanga Akhilesh-a ban a nih loh tur thu a sawi bawk.

Nimin khan Mulayam Singh chuan Lucknow-ah press conference neiin, a fapa Akhilesh leh a unaupa Shivpal te inkarah harsatna awm mah se, an chhungkua chu an ṭanrual thu a sawi. Press conference-ah hian Shivpal hian a ṭhutpui a, Akhilesh erawh a inlan ve lo.