JNU zirlaiten kawng an zawh

Delhi-a Jawaharlal Nehru University (JNU) zirlaite chuan a zirlaipui chin hriat loha awm mek Najeeb Ahmed chu zawng hmu thuai tura thuneitute phutin, Thawhṭanni tlai khan Mandi House aṭanga Jantar Mantar thlengin kawng an zawh.

Kawngzawhnaah hian zirlai 1,000 vel an tel a, JNU thuneitute leh police te chunga an lungawi lo thute an aupui. Jantar Mantar-ah hian buaina a chhuah palh venthawn thilah police ṭhahnem tak duty tir an ni a, kawngzawhte lo danna pawh siam a ni bawk.

M.Sc zirlai, kum 27 mi Najeeb Ahmed hi October 14 zan aṭang khan chin hriat lohin a awm a ni. Hemi zan hian hostel-a an inhnialbuai hnuah Akhil Bharatiya Vidyarthi Parishad (ABVP) member-te'n Ahmed hi kut an thlak a, a chin hriat lohin a awm zui a ni.

JNU zirlaite chuan Ahmed-a chin hre tura chak taka hma la turin thuneitute an ngen a, kutthlaktute chungah action la turin an phut bawk. Jawaharlal Nehru University Students Union (JNUSU) chuan Delhi Lieutenant Governor Najeeb Jung-a hnenah memorandum an thehlut nghal bawk a, Ahmed-a chungchangah university leh police-te hmalak dan chu hriat an duh thu an sawi. Delhi Chief Minister Arvind Kejirwal pawh hmuh an tum thu an sawi bawk.

Delhi Police-te chuan Ahmed-a awmna emaw, a chanchin hrilh emaw hnenah lawmman, Rs 50,000 pek a phal chu, Thawhṭanni khan cheng nuai khatah a tipung. Police-te chuan Indian Penal Code (IPC) section 365 hnuaiah thubuai an ziak lut tawh bawk a ni.