Ramchhung Lawrkhawm
Delhi bazar-a thil puakah mi pakhat a thi
Old Delhi-a Naya Bazar-ah nimin khan thil puak vangin mi pakhat a thi a, mi dang panga-in hliam an tuar.
He thil puak thlen chhan hi hriat chian a la ni lo a, mi ṭhenkhat chuan a hma lawkin mi pakhat halpuah bawm lian tak keng an hmuh thu an sawi. He thil puak hian an bula vel dawr pawh a tichhe nual a ni. Delhi Police anti-terrorist cell koh nghal an ni a, anni hial thil awmdan an chhui chiang mek a, Forensic team pawh koh an ni bawk.
Thil puahna bulah hian halpuah siamna hmanrua pawh hmuh a ni a, mipui tlawh theih loh turin khar nghal a ni. Home Minister Rajnath Singh chuan Delhi Police Commissioner Alok Verma biain, he thil thlenga inhnamhnawihte zawngchhuak a, a ṭul anga action la turin a hriattir.
SC-in ramdanga a thil neih zat puang turin Mallya hriattir
Supreme Court chuan sumdawng lian, Vijay Mallya chu ram danga a thil neih zat puang turin a hriattir a, heng zingah hian February thlaa Diageo hnen aṭanga dollar maktaduai 40 a dawn dan kimchang pawh sawi turin a hrilh bawk. Hemi atan hian kar thum chhung hun a pe.
Vijay Mallya hian a airline titawp tak, Kingfisher Airlines hmingin bank 17-ah loan, cheng vaibelchhe 9,091 a ba a ni. Bank intelkhawmte hi Supreme Court-ah an zualko hnuin Mallya hian India a chhuahsan a, tun thlengin London-ah a la awm a ni. A thubuai hmachhawn turin koh ni ṭhin mah se, India ramah a la rawn kir duh lo a ni.
Army tana sum thawh tur mahni duhthu ngeia pek tur : Parrikar
Defence Minister Manohar Parrikar chuan Indian Army tana sum thawh chu mahni duh thu ngeia pek a ni tur a ni tiin, politics thila army hnuhluh a ni chu pawi a tih thu a sawi.
Tun hnaiah Maharstra Navnirman Sena (MNS) chuan film producer-te chu an film siamah Pakistan actor-te an hmang dawn anih chuan army welfare fund-ah cheng vaibelchhe nga pe turin an tuk a ni. Mahse army lam chuan hei hi an pawm lo tih sawiin, midangte intihbuaina kara army te telh an ni chu a lawmawm lo hle tih an sawi. Minister chuan a duhte tan sipai martar chhungte ṭanpuina tur sum pekna tur, Battle Casualty Fund siam a ni tih a sawi.