Punjab-ah Pakistan tana enthlak hna thawktu man belh

Punjab police-te chuan nimin Nilaini khan Pakistan tana enthlak hna thawktu ni ngeia hriat Jasbir Singh an man. Sing hi Punjab-a Mahlan thingtlang khuaa cheng a ni.

Director general of Police(DGP) Punjab, Gaurav Yadav chuan Jasbir Sing hi YouTuber niin 'Jaan Mahal' tih hming vuahin channel enkawl lai a nei a, Jutt Randawa firfiak pawl tana thawk nen in zawmna a neih thu leh, thla tir lama enthlak hna thawk YouTuber, Haryana-a an man tak Jyoti Malhotra nen in hnimhnaihna an nei bawk niin an sawi.

Jasbir Singh hian Pakistan National Day lawmna Delhi-a neihah pawh khan a tel in, hemi ṭum hian Pakistan Army official leh Haryana YouTuber Jyoti Malhotra-te nen an in hmu tih hriat chhuah a nih thu an tarlang bawk. Kum 2020, 2021, leh 2024 ahte Pakistan a tlawh tih hriat chhuah a nih bakah a electronic hmanrua, Pakistan mi leh sa biak pawpna number eng emaw zat awmna pawh man a ni. Singh lakah hian FIR ziah luh ni tawhin ramri pela firfiak pawl chetna leh inkungkaihna nei te hailan an nih theihna turin chhuichianna kal pui mek a nih thu police chuan an tarlang.

Pahalgam-a firfiak pawl chetna thlen hnuah Pakistan Inter-Services Intelligence tana enthlak hna thawktu eng emaw zat chu ramchhung hmun hrang hrangah man an lo ni tawh a ni. Punjab-a State Special Operation Cell (SSOC) chuan firfiak pawl thlawptu, Pakistan tana enthlak hna thawk mi 12 chuang man tawhin, an zingah hian YouTuber pahnih an tel.