India-ah darkar 24 chungin Covid-19 kai thar mi 1,553 awm

Union health ministry chuan Pathianni khan India ramah darkar 24 chhungin Covid-19 kai thar mi 1,553 an awm tih a tarlang a, hemi ni vek hian he hri vanga thi hi  mi 36 an awm tih a tarlang bawk. 

March 25 khan sorkar laipui chuan hri darh tur venna atan ram pumah inkhar­khip (lockdown) a puang a, heti chung hian hri kai hi an la awm chho zel a ni. Sorkarin khuahkhirhna bial (containment zone) a puanna hmun tih  lohah chuan nimin aṭang khan inkhuahkhirhna ṭhenkhatte chu thlahdul a ni.

Hri kai enkawl dam tawh lamah India chuan hma a sawn chho hret hret a, nimin zing khan enkawl dam lama hmasawnna rate hi 14.75% a ni a, Pathianni khan 14.19% a ni thung. Nilaini (11.41%), Ningani (12.02) leh kar liam ta Inrinni khan 13.06% a ni a, kar liam ta aṭanga a lan dan chuan hri kai enkawl damna kawngah hian India chuan hma a sawn chho hle. 

Prime minister Narendra Modi chuan Covid-19 hian chi, hnam, ṭawng leh sakhua a thliar hran loh thu a sawi a, chuvang chuan he hri beihna kawngah hian tute pawh kan ṭan tlan a pawimawh a ni, a ti. "He hri hian kan nunphung min thlak danglam sak a, kan inte chu office-ah kan hman a ngaih phah a, internet chu meeting room atan hman a ngai ta bawk a ni," tiin Modi chuan hri vanga nunphung a danglam thu a sawi. 

Telangana chief minister K Chandrashekar Rao chuan May 7 thleng awh turin lockdown a puan belh. Lockdown hi khauh taka kalpui tum a ni a, mobile application-a food delivery ang chi pawh khap vek a ni. May 5-ah an state dinhmun chu cabinet-in thlir hona an nei ang. 

Ni 14 liam ta chhung khan India rama state 14-a district 54-ah hri kai thar hmuhchhuah an ni lo tih union health ministry official Lav Agarwal chuan a sawi a ni. 

India rama hri kai zinga mi 4,291-te chu thla hluia Tablighi Jamaat ho buatsaih Delhi, Nizammudin-a muslim ho inkhawmpuia kal leh heng mite hnen aṭanga kaite an ni tih Lav Agarwal chuan a sawi bawk a, India rama hri kai zawng zawng aṭanga 29.8% an tling pha a ni.