Damdawi dawra damdawi leite chhinchiah turin ngen
Ram chhunga Covid-19 hri kai an pun belh zel avangin, state sorkar ṭhenkhat chuan an state-a pharmacist-te leh damdawi dawra dawr nghaktute chu damdawi leite phone number leh address kimchang la turin an ti.
Telangana, Andhra Pradesh, Maharashtra, Odisha, Bihar (hmun ṭhenkat) leh Chandigarh state-te chuan damdawi dawra khuh, khawsik leh hri kaihhnawih damdawi leite chu thuneitute chuan an phone number leh address la turin an hriattir a ni.
Telangana principal secretary (Municipal Administration and Urban Development) Arvind Kumar chuan vantlang thinhrik hlauh vangin, mi ṭhenkhatte chu khawsik an kai pawhin damdawi dawrah an khawsik tih rehna tur damdawi, paracetamol-te an lei mai ṭhin tih a sawi. Heng mite hi hri an kai nge kai lo tih test neih pui a pawimawh a ni, tiin Arvind Kumar chuan a sawi bawk.
Maharastra-a Food and Drug Administration (FDA) chuan state chhunga pharmacist-te chu hydroxychloroquine tiamin an state-a damdawi leite chhinchiah turin a ngen. Hri kaite hi hriatchhuah hma an nih chuan an dam leh hma theih nan enkawlna pek thuai an ngai a, hei vang hian heng hmalakna hi ramchhunga Covid-19 kai hriat chhuah zung zung theih nana tih a ni.