Thamna laa puh Yeddyurappa-a'n thiam a chang

Central Bureau of Investigation (CBI) special court chuan Karnataka chief minister hlui, BS Yeddyurappa chu danloa iron ore khur siamna tura thamna, cheng vaibelchhe 40-a laa puh a nihna thubuaiah nimin khan thiam a chan tir.

Special court chuan Yeddyurappa-a fapa pahnih leh a makpa pawh thiam a chantir nghal bawk.

Judge RB Dharmagouder-a'n court thutlukna a puan lai hian court hall-ah mi tam tak an pungkhawm a ni.

Court thutlukna puan a nih hnuah CM hlui leh state BJP president ni bawk, Yeddyurappa chuan thu dik chu hai lan a ni ta tih sawiin, dik lo taka puh a nih thu a sawi a, a tawpah chuan thudik chu a dingchang ta a ni, a ti. Hun khirh tak a tawh laia amah thlawptute chungah lawmthu a sawi nghal bawk. Yeddyurappa chuan thil dik lo tak tiha puh a nih chungchangah, thu dik hailan a la ni ngei dawn tih a ring tlat niin a sawi bawk.

Kum 2011, August thla khan Bellary district-a dan loa irone ore khur siam a nih chungchangah, Yeddyurappa hi inhnamhnawihah puh niin, thamna sum pawh tam tham tak a dawng nia puh a ni. Kum 2015, October thla khan CBI chuan Yeddyurappa leh a fapate pahnih - BY Raghavendra leh BY Vijayendra bakah a makpa Sohan Kumarm, private steel company leh Yeddyurappa chhungkaw enkawl Trust lakahte thuneihna hmang dik lo leh, eiruknaa inhnamhnawiha puhin thubuai a siamsak a ni. Thubuai ngaihtuah chhung hian thuhretu mi 216 koh an ni.

Thamna sum laa puh a nih vang hian kum 2001, July 31 khan Yeddyurappa hi chief minsiter a nihna aṭangin a ban phah a, kum 2012 November thla khan BJP chhuahsanin party thar, Karnataka Janata Paksha a din a, kum 2013 assembly inthlanah khan an ding a ni. Mahse kum 2014 Lok Sabha inthlanpui neih dawn khan an party hi BJP-ah an inchhunglut leh a, tunah hian Karnataka state BJP president a ni mek.