Sisodia-a'n Delhi-a zu dawr enfiah turin ti

Delhi Deputy Chief Minister Manish Sisodia chuan Delhi khawpui chhunga zu dawrte chu kar khat chhunga enfiah vek turin a ti a, khawlaia zu ruite hremna tur chu Delhi sorkarin a siam dawn a ni, a ti.

Manish Sisodia chuan zu dawr bul, khawlaia zu in leh zu rui awm ṭhinte hremna na tak siam tur hian vawiinah excise official-te chu meeting a neihpui tur thu a sawi bawk.

Tun hnaiah Mayur Vihar Phase-2 bial chengten, zu zawrhna dawr bul khawlaiah zui in an awm ṭhin tia complain an thehluh avangin sorkar hian hma a la nghal a, excise official-te pawhin zu dawr pali an endik tawh a ni. Delhi-a excise rules hman mekah chuan vantlang hmuna zu in khap tlat a ni a, a ti luite chu na taka hrem theih an ni.

Delhi-a rorellai, Aam Aadmi Party (AAP) sorkar chuan kumin chhungin Delhi-ah zu dawr siam thar a awm lo tih sawiin, zu dawr awm mekte pawh an awmna ṭhenawm khawvengte tana harsatna thlen a, complaint a awm chuan khar sak an nih tur thu a sawi.