India-in khawlum a hmachhawn dan tarlang

Dr PK Mishra, Principal secretary to the Prime Minister chuan Zirtawpni liamtaa Geneva-a UN meet-a 'Extreme Heat Risk Governance' special session-ah India-in khawlum zual lo thleng thei laka invenna leh dawngsawng tura ruahmanna a siamte a tarlang.

Mishra chuan boruak lum zual zelin vantlang hriselna a nghawng theih dante, sum dinhmun a nghawng theih dan leh kan chhehvel thil awm thlenga a nghawng pawi theih dan te a tarlang. UNDRR Common Framework for Extreme Heat Risk Governance chu ṭha a tih thu leh, khawvel huapa inzirtirnate, kaihhruainate, leh thawh hona inzirtirna hmun ṭha mamawh a nih thu te a sawi bawk.

India-in khawlum zual vanga chhiatna hrang hrang lo thleng thei laka a inpuahchah leh daih rei thei tur ruahmanna a neih thute a tarlang tel. Kum 2016-a National Disaster Management Authority (NDMA) kaihhruaina tih chhuah, kum 2019-a ennawn chuan khawlum zual lo thleng thei laka ruahmanna ṭha tak a siam thu sawiin hemi hnuaiah hian Heat Action Plans (HAPs) duan a nih thu a tarlang. Heng bakah khawlum zual lo thleng laka in venna, hmachhawnna, leh kaihhruaina ṭha kalpui a nih theihna turin India sorkar chuan National and State Disaster Mitigation Funds (SDMF) aṭanga hmalakna tur sum a ruahman vek a nih thu te a tarlang a ni. Tualchhung thuneitu, NGO, sumdawng leh mimal tinte chu he fund kal tlang a puihna pek theih tur a ni tel bawk niin a sawi.