Defence document lei rutu Pakistan official man

Delhi Police-te chuan Pakistan High Commission officer leh midang pahnihte chu defence document an ruk avangin Nilaini khan an man a, nimin khan Ministry of External Affairs chuan Pakistan High Commissioner to India Abdul Basit koin, thil awmdan a hrilh nghal.

Police-te'n an man hi Pakis≠tan High Commission official Mehmood Akhtar leh India mi pahnih an ni. Police-te chuan kum khat leh chanve vel Pakis≠tan intelligence agency, ISI hnenah thuruk an lo hrilh ṭhin a, thla ruk kalta aṭang khan an enthlak thu an sawi.

Nilaini zan khan Mehmood Akhtar hi police-te'n manin thu an zawtfiah nghal a, mahse diplomic immunity a neih avangin a hnuah chhuah leh nghal a ni. Akhtar hi India-a Pakistan High Commission-ah kum thum a thawk tawh a, Nilaini khan Dehi Zoo bulah India mi pakhat hnen aṭanga document a lei lai chu man a ni. Police-te chuan Akhtar hi darkar 48 chhunga India ram chhuahsan tura hriattir nghal a ni tih an sawi.

Delhi Police chuan Akhtar chu Pakistan army-a Baloch regiment-ah havildar a nih
ṭhin thu sawiin, a hnuah ISI chuan chhawrin, Pakistan High Commission-a visa department-ah a thawk zui a ni, a ti. An man lai hian Pakistan official hian India khua leh tui a nih thu sawiin, Aadhar card lem pawh a lo nei tih police-te chuan an sawi.

India mi pahnih an mante hi Rajasthan state mi, Maulana Ramzan leh Subhash Jangir-te an ni a, Pakistan High Commission staff hnena thuruk pawimawhte hralh ṭhinah puh an ni. An kut aṭang hian Defence leh BSP deployment map bakah visa kaihhnawih document pawimawhte an man tel a ni.

Maulana Ramzan hian kum khat leh a chanve vel liamta khan Shoaib tih nen inhriain, a ni hian Gujarat leh Rajasthan-a army leh parmilitary force dah dan chungchanga information pawimawhte hrilh turin a lo thlem a ni. Hemi hnuah an pahnih hian Akhtar hi an hmu a, a ni hian defence kaihhnawih thil information emaw, document emaw an pe thei a nih chuan lawmman ṭha tak pek a lo tiam a ni. Maulana hian Subhash Jangir chuan leiba tam tak a nei tih hriain, thawhpui tur hian a thlem zui ve leh a ni.