Mobile phone-ah panic button dah dawn

India ram chhunga hmeichhia≠te himna tura hmalakna kawng khat atan, nakkum January thla aṭang chuan ramchhunga mobile phone hralh chhuahah 'panic button' dah vek a ni tawh dawn. Hei hi harsatna tawkten rang zawka police-te an hrilh theihna tur a ni.

Hemi chungchang hi Nilaini khan Deli Police-te chuan Delhi High Court an hrilh a ni. Hei hi hman a nih hnuah India chu hmeichhiate himna tura safety measure hmang hmasa ram zingah a tel thei dawn a ni.

National Crime Records Bureau chuan nikum chhung khan ram chhunga hmeichhiate chungah pawikhawihna report 3,27,394 a awm tih sawiin, hengte hi pawngsual, inkhawih luih, rukbo leh rawng taka kut thlaknate a ni. Kum 2015 khan ram pumah hmeichhe pawngsual report 34,651 a awm a, heng zinga 2,199 hi Delhi khawpui chhunga thleng a ni.

Delhi Police-te chuan December 16, 2012-a khawpui chhunga rawng taka hmeichhe pawngsual rawn a nih hnuah hmeichhiate himna tura a hmalak dante ngaihtuahnaah January 1, 2017 aṭanga panic button hman a nih tur thu hi a sawi. Panic button hi emergency number 100 nen thlunzawm a ni ang.

Kumin April thla khan deparmtent of telecommunications chuan panic button chungchanga rules-te a lo tichhuak tawh a, heng rules hnuaiah hian mobile-te chuan key 5 emaw, 9 emaw ah panic button hi an nei vek dawn a ni. Kum 2018, January aṭangin mobile phone-te chu satellite based GPS kaltlangin an awmna hmun hriat thehna tur facility dah vek tura tih an ni bawk.