Maoist-te'n AP CM thahah vau

CPI (Maoist) chuan Andhra Pradesh leh Odisha ramri-a security force-te'n Maoist hel 28 an kahhlum chungchangah, Andhra Pradesh Chief Minister N Chandrababu Naidu leh a fapa, Lokesh-te chu mawhphurtuah puhin, an pafa chuan an thihchilh ve dawn tih an sawi.

Kum 50 zet sorkar lakah hel tawh mah se, Maoist helte hian tun ṭum hi politician-te thihchilh an tum thu an sawichhuahna hmasa ber a ni. Maoist-te hi suicide squad siam ṭhin, Liberation Tigers of Tamil Eelam (LTTE) nen pawh inzawmna ṭha tak an nei nia sawi a ni.

CM leh a fapa an vauna thu hi media mite hnenah pein, CPI (Maoist) Andhra Pradesh committee thupuangtu Shyam chuan Naidu hian kum 2003, October thla khan Alipiri-ah thah tuma beihna chu a lo pumpelh tawh a, mahse a dawt lehah chuan a pumpelh theih tawh dawn lo tih sawiin, police leh military force-te'n an chhan thei tawh dawn lo a ni, a ti.

Shyam chuan Naidu chuan sorkar laipui nen inthurualin Maoist hruaitu leh an pawl member-te that turin Andhra-Odisha border-a Malkangiri-ah beihpui an thlak a ni, a ti. Naidu chu tun hma lam pawhin hetianga inthahna thlentir foah a puh a,"Kum 10 hnuah thuneihna a chan leh hnuah, hnathawktu mi 21 te chu red sander tawlhru tia dawta inbeihna hmangin a thah tir tawh a ni" tiin a sawi.