Ramchhung Lawrkhawm

Ramri-a inkahna thlengah BSF officer a thi

Jammu and Kashmir-a RS Pura sector-a International Border-ah Nilaini zan khan Pakistan sipaiten silai leh laipui hmangin ramri bul khuate an kap a, Border Secuity Force officer pakhat a thi a, civil mi pasarihin hliam an tuar.

Pakistan sipaite hian zing 9:35 velah RS Pura biala India post te chu an bei a, zing dar 1:30 velah ramri bula Sai Kalan, Bure Jall, Treva leh Arnia-a civil mite awmna chu an kap leh nia sawi a ni. BSF head constable Jitender Kumar chu laipui mu puak avangin hliam na tak a tuar a, a hnuah damdawi-inah a hliam tuar loin a thi a, hliam tuar zinga pahnih chu an ngaihtuahawm hle bawk. Kar khat chhungin ramri-a inkahna thlengah hian BSF sipai pathum an thi tawh a ni.

India sipaite chuan kap let vein, nimin zing dar 7 thleng khan ram pahnih sipaite hi an inkap zui a ni.

Bird flu dinhmun zirchiang tur committee din

Sorkar laipui chuan bird flu leng mek dinhmun zir≠chiang turin committee a din.

Delhi Zoo-ah sava thi te sample 45 enfiah tura Delhi sorkarin Bhopal-a forensic lab-a a thawn chu enfiah a nih hnuah, 13 chu bird flu, H5N8 vanga thi an ni tih finfiah a ni.

Delhi Animal Husbandry Minister Gopal Rai chuan Delhi khawpui chhung hmun hrang hrang aṭanga sample an lak 85 chu Bhopal lab-ah hian thawn a ni tih sawiin, mahse sample an thawn zinga 27 result chauh pek an nih thu a sawi. Hei vang hian sorkar laipui hnenah Bhopal lab thuneitute chu report pekchhuak lamah chak zawka hma la tura nawr turin a ngen.

Bird flu darh mek chungchang zirchiangtu tur committee hi Joint Commissioner of Animal Husbandry Department-in a kaihruai dawn a, Health Ministry, Evironment Ministry leh Forest Ministry aiawhte bakah Delhi sorkar aiawhte an tel ang.

Committee hian thil awmdan a zirchian bakah, Delhi sorkarin bird flu darh zel tur venna atana a hmalakna kaqwng hrang hrangah a pui dawn bawk a ni.