Pakistan-in Indian official hnawtchhuak

India-in enthlatua puha Pakistan High Commission official pakhat a hnawtchhuah avanga phuba lak nan, Pakistan chuan an rama Indian High Commission official chu Ningani zan khan an ram chhuahsan turin a ti.

Ministry of Foreign Affairs of Pakistan chuan thuchhuah siamin," Foreign Secretary chuan Ningani khan Indian High Commissioner koin, Pakistan sorkarin Indian High Commisison official, Surjeet Singh chu an rama awm zui zel an remtih loh thu an hrilh a ni" a ti.

India rama Pakistan High Commission official, Mehmood Akhtar chu India defence document-te leiru a, enthlatua puh a nih avanga India chhuahsan tura hriattir a nih avangin Pakistan hian phuba a lak ve rin a nih thu officialte chuan an lo sawi tawh a ni. Pakistan chuan Singh an hnawhchhuah chhan chu Geneva Convention a palzut vang niin a sawi a, October 29, 2016 hmain amah leh a chhungte chu Pakistan ram chhuahsan turin a hrilh a ni.

Police-te chuan Ningani zan khan Pakistan official hnena defence document hralhnaa inhnamhnawiha puh, Shaoib chu Jodhpur bulah an man a, New Delhi-ah hruai nghal a ni. Hemi hma hian documents hralhtu, India mi pahnih Maulana Ramzan leh Subhash Jangir-te chu man an lo ni tawh bawk. Shoaib hi India thuruk hralhruk a nih theih nan Subhash leh Maulana-te thlem luttu ber nia puh a ni.