India leh Estonia-in tang inthlengna tur inremna ziak dawn

India leh Estonia chuan tang inthlengna tur inremna thu≠thlung an ziak dawn a, he inremna ziak tur hian sorkar laipui chuan a pawmpui tawh a ni.

Prime Minister Narendra Modi-a kaihhruai Union cabinet chuan Estonia nen hian tang, thiam loh chantir tawhte inthlen tawnna tura inremna tiam tur hi a pawmpui a ni. He inremna hi ziah fel a nih hunah Estonia rama India mi tang awmte chu an chhungte bul hnaia awm tura India rama lak an nih theih nan ruahmanna siam nghal a ni ang. Estonia pawhin hetiang bawk hian ruahmanna a siam ve dawn a ni.

Kum 2004 hmalamah kha chuan ram dang mi tangte an rama an tan hun hmang tla tura sawnchhuah theihna emaw, ramdanga India mi tangte India rama tang chhunzawm tura sawn theihna dan siam a ni lo. Mahse tangte hi an mahni rama tangte sawn an nih theihna tur hian Repatriation of Prisoners Act, 2003 chu siam a ni.

India tang inthleng tawn theihna tur hian United Kingdom, Mauritius, Bulgaria, France, Egypt, Sri Lanka, Cambodia, South Korea, Saudi Arabia, Iran, Bangladesh, Brazil, Israel, Bosnia & Herzegovina, UAE, Italy, Turkey, Maldives, Thailand, Russian Federation, Kuwait, Vietnam, Australia, Hong Kong, Qatar, Mongolia, Kazakhstan leh Bahrain-te inremna a ziahpui tawh. Inremna ziah a nih hnu hian tang 65 inthleng a ni tawh a, an zinga mi 55 chu India mi an ni.