Ramchhung Lawrkhawm

Japan-ah PM a zin dawn

Prime Minister Narendra Modi chu November 11-12 hian Jpana raah a zin dawn a, a cham chhungin ram pahnih tehian civil nuclear lama thawhdunna tur inremna an ziahfel rin a ni. Kum 2014, August thla khan Japan hi alo tlawh tawh bawk.

PM hian Japan Emperor Akihito a hmu dawn a, Japan Prime Minister Shinzo Abe nen ram pahnihte thawhdunna chungchang an sawidun bawk ang. Civil nuclear lama thawhdunna an siam a nih chuan Japan-in India rama a nuclear plant technology-te a thawnchhuak thei dawn a ni. Inremna hi an ziak a nih chuan Japan-in Nuclear Non-Proliferation Treaty zawm lo ram nena civil nuclear lama thawhdunna tur a ziahpuina hmasa ber a ni bawk ang. India-a Japan ambassador, Kenji Hiramatsu chuan technical lam thilte sawifel vek a nih hunah civil nuclear deal hi ziah a ni dawn tih a lo sawi tawh a, hemi chungchang hi an buaipui mek niin a sawi bawk.

Allahabad High Court compound-ah bomb awmna bag chhar

Allahabad High Court compound chhungah Ningani zan khan bomb awmna bag chhar a ni.

Official-te chuan court room chhunga plastic bag an chharah hian crude bomb, halpuah bakah hmanraw dangte hmuh a ni tih a sawi a, mahse hengte hi pawikhawihna lian tham thlen thei an ni lo niin an sawi. Plastic bag hi court room no 55-ah hmuh a ni a, hmuh a nih veleh staff-te chuan thuneitute hrilhin, District Magistrate Sanjay Kumar leh Senior Superintendent of Police Shalabh Mathur hoin official-te an kal nghal a ni. Bomb disposal squad pawh koh an ni a, anni hian bomb awmna bag hi hmun him lamah an la sawn nghal a ni.

SC-in judge appointment tikhawtlai lo turin hriattir

Supreme Court chuan judge appointment siam tur chu tikhawtlai lo turin sorkar laipui a hriattir a, hna lak tur hi chak zawka a kalpui a nih loh chuan Prime Minister Office(PMO) a official-te chu insawifiah tura a koh tur thu a sawi.

Chief Justice of India TS Thakur chuan court-a sorkar laipui aiawha ding, Attorney General Muluk Rohatgi hnenah judge lak turte hming chungchang hi sorkar laipui chuan thla kua zet a buaipui tawh a, tihfel a hun tawh niin a sawi. Hetih lai hian AG chuan judge appointment chungchangah hian sorkar leh SC inkarah buaina a awm lo tih a sawi a, Memorandum of Procedure (MoP) thar chu tihfel a nih chuan hna pawh chak zawka an kalpui theih tur thu a sawi.