India-ah darkar 24 chhungin Covid-19 vangin mi 47 thi
India ramah Thawhṭanni khan darkar 24 chhungin Covid-19 vangin mi 47 an thi tih union health ministry chuan a tarlang.
Thawhṭannia thil thleng hi ni khat thil thua India rama Covid-19 vanga thihna a thlen tam ber ṭum a ni. Ram pumah lockdown puan a ni chungin hri kai zat hi an pung zel a, thi zat pawh hi 600 an tling tawh a ni.
Nimin zing khan coronavirus kai enkawl dam lama hmasawnna rate hi 17.48% a ni a, Thawhṭanni khan 14.75% a ni thung. Ram puma enkawl dam tawh zawng zawng hi mi 3,252 an ni.
Covid-19 leh a kaihhnawih
1) Delhi-a Max Hospital-a hri kai enkawl kum 49 mi chu India rama thisen var hmanga enkawl dam hmasak ber niin, thisen var hi hri kai enkawl dam tawh thisen pek aṭangin a ni.
2) Rashtrapati Bhavan complex-ah nimin khan sanitation worker-in Covid-19 a kai tih hriat chhuah a ni a, hei vang hian he complex-a khawsa mi 100 chuang chu quarantine zui an ni.
3) India state zinga hri kai tamna ber Maharashtra chuan an state hmun ṭhenkhatah (Dharavi telin) hri laka invenna atan, anti-malaria drug hydroxychloroquine hman an rem ti dawn tih health minister Rajesh Tope chuan a sawi.
4) Mumbai-a mi rethei chenna, Dharavi slum area-ah Covid-19 kai mi 168 an awm tawh a, mi 11 in an thihpui tawh bawk. Thawhṭanni khan he bialah hian hri kai thar hi mi 30 an awm a ni.
5) Thawhṭanni aṭang khan sorkar laipuiin hotspot-a a chhiar loh zawngah khuahkhirhna thlah dul ṭhen a ni a, he hmalakna hi economy lama chhiatna nasa zawk kan tawh loh nana tih a ni.
6) Indian Council for Medical Research (ICMR) chuan West Bengal-a testing kit ṭha lo an thawn palh chu an thlaksak dawn tih an tarlang.
7) United Nation General Assembly chuan Thawhṭanni khan Covid-19 damdawi hmuchhuah hma a nih theih nan, resolution "equitable, efficient and timely" tih chu a pawm.