Mumbai-ah chanchinbumi 53-in Covid-19 an kai
Mumbai-ah chanchinbumi 53-in Covid-19 an kai tih Brihanmumbai Municipal Corporation (BMC) chuan a tarlang.
BMC hmalaknain April 16 leh 17 khan chanchinbumite tan Mumbai-a Azad Maidan hmunah Covid-19 test-na buatsaih a ni a, he hunah hian chanchinbu lama thawk electronic and print media journalist, photographer leh cameramen telin mi 171 enfiah an ni a, heng zinga mi 53-te chuan hri hi an kai tih hriatchhuah a ni ta a ni.
Chanchinbumi hri kai hriat chhuahte hi Covid-19 hri natna lan chhuahna anmahniah hmuh a awm loh thu BMC thupuangtu Vijay Khabale chuan a sawi. Mumbai-ah hian hri kai hi mi 2,724 an awm tawh a, thi hi mi 132 an awm tawh bawk.
Delhi-in journalist-te test dawn
Delhi chief minister Arvind Kejriwal chuan media mite chu hrileng an kai leh kai loh enfiah an ni dawn tih nimin khan a sawi.
Mumbai-a journalist 53-in hri an kai tih hriat a nih hnuah twitter kaltlangin Arvind Kejriwal hnenah hian media mite a ruala test neih rawtna thlen a ni a, Kejriwal chuan chhangin Delhi-a media mite chu test an neihpui dawn tih a sawi a ni.
CM hian hemi chunghchang hi a sawizau lo thung. Delhi-ah hian hri kai hi 2,081 an awm tawh a, nimin zing lamah khan case 78 a awm belh leh bawk.