Sorkar laipuiin Covid-19 team a tirh danah inhnialna a awm
Sorkar laipuiin hripui leng mek avanga ram puma lockdown hman mek palzut a nih leh nih loh chungchang enfiah tura Covid-19 team a tirhchhuah dan chuan sawi zui a hlawh hle.
Inter-ministerial central team-te hi state paliah tirh niin, heng zinga state pathum hi BJP ni lo party dang sorkarna vek an ni.
Central team hian Pune, Maharashtra; Jaipur, Rajasthan; West Bengal-ah Kolkata, Howrah, Midinapur East, 24 Parganas North, Darjeeling, Kalimpong bakah Madhya Pradesh-a Indore khuate an tlawh dawn a ni. An tlawh tur zingah hian Madhya Pradesh chiah hi BJP sorkarna a ni.
Sorkar laipui chuan heng khawpui hrang hrangah hian lockdown hman mek chu an palzut nasa hle niin a sawi a, heng state sorkarte hian Covid-19 case chungchang pawh an report ṭha tawk lo niin a sawi bawk.
Hetih lai hian central-a BJP kaihhruai sorkar thil tih dan hian sawizui a hlawh hle thung. West Bengal chief minister leh Trinamool Congress hruaitu, Mamata Banerjee chuan union home minister Amit Shah-a'n central team an kal tur thu a hrilh chian hmain, heng team hian Kolkatta an thleng hman der niin a sawi. Sorkar laipuiin enfiah tura a tih district pali zinga pathumah hian ni 14 chhung chu hri kai thar pakhat pawh an awm lo tih a sawi bawk.
Trinamool MP Derek O'Brien chuan state hrang hrang chuan hri leng doin theihtawp an chhuah a, hetihlai hian sorkar laipui chuan state ṭhenkhat chu a lo bei let ve thung a ni, a ti. BJP sorkarna, Gujarat-ah hri kai thar an pung chak hle chungin, sorkar laipui chuan enfiah tura a tih zingah a telh lo tih an sawi bawk a ni.