Bhopal jail aṭanga tlanchhuak SIMI helte kaphlum

Madhya Pradesh-a Bhopal jail aṭangin Students Islamic Federation of India (SIMI) hel mi pariat an tlanchhuak a, mahse police-te chuan tang tlanchhuakte hi nimin vek khan an kaphlum vek a ni.

Thawhṭanni zing dar 2 vel khan mi pariatte hi an tanna, Bhopal Central Jail aṭangin an tlanchhuak a ni. Tang tlanchhuakte hian guard pakhat an that a, midang an hreng bawk. Jail-a chaw eina atana an hman ṭhin, thirfian hmangin C Block-a guard Ramashankar Yadav an that a ni. Hemi hnu hian guard pahnihte chu zing dar 2-3 inkar vel khan an hreng bawk a, hemi hnu hian an bet sheet leh thingte chu leilawn siamna atana hmangin, jail aṭang hian an tlanchhuak a ni.

Police-te chuan tang tlanchhuakte hi umzui nghal≠in, jail aṭanga hla vak lo, Eintkhedi khaw daiah nangchingin an inkap zui a ni. Police-te chuan tang tlanchhuakte chu hualin, inpe turin an hriattir a, mahse anni hian police-te chu an lo kap a, police-te chuan kaplet ve nghalin an pariat hian kahhlum an ni ta a ni. Tang tlanchhuak leh police-te hi minute 30 vel an inkap nia sawi a ni. Police-te chuan tang tlanchhuak zinga pali-te chu kum 2013, October 1 khan Khandwa district-a Tantya Bheel Jail aṭangin an lo tlanchhuak tawh niin an sawi.

SIMI hi kum 1977 khan Muslim ṭhalaite pualin din a ni a, mahse an chetdan a firfiak chho a, kum 1992-a Babri Masjid ṭhiah tumah khan an che na hle. Sorkar laipui chuan kum 2001 khan dan pawnah a hnawl a, mahse member-te hian a ruka intelkhawm rengin an huang pawh an la zauh reng nia sawi a ni. Madhya Pradesh, Andhra Pradesh, Telangana, Karnataka, Tamil Nadu, Maharashtra, Uttarakhand leh Uttar Pradesh-a pawikhawihna thleng ṭhinah pawh an inhnamhnawih fo nia sawi a ni.

Bhopal jail aṭanga mi pariat an tlanchhuah chungchangah hian Madhya Pradesh sorkar chu report thehlut turin Union Home Ministry chuan a hriattir nghal. Jail enkawl danah thil fel tawk lo a awm em tih enfiah a, hetiang thil a thlen nawn tawh lohna tura hma la nghal turin a hrilh bawk.