Rahul Gandhi hoin Congress-in kawng zawh

Congress party chuan Prime Minister hlui, Indira Gandhi thih champha pualin nimin khan Delhi-ah kawng an zawh a, kawngzawh hi party vice president Rahul Gandhi-an a ho.

Kawng zawh hi 24, Akbar Road-a party headquarters aṭanga ṭanin, Indira Gandhi memoral musuem awmna, 1, Safdarjung Road thleng an zawh a, party hruaitu hlun eng emaw zat an tel.

Delhi sorkar chuan India Gandhi thlan awmna, Shakti Sthal chu bird flu vanga varak pahnih an thih hnuah a khar rih a ni. Prime Minister Narendra Modi pawhin a twitter-ah Indira Gandhi zahna a hlan bawk.

Indira Gandhi hi India rama hmeichhe Prime Minister ni thei hmasa ber a ni. Kum 1917, November 19-ah a piang a, Punjab-a inlakhran tumte laka beihpui thlakna tur, Amritsar-a Operation Blue Star kalpui tura thupek a tihchhuah hnuah, kum 1984, October 31 khan amah vengtu, Sikh mi pahnihin PM chennaah an kaphlum a ni. Indira Gandhi kaphlumtute pahnih hi thi tura an chungthu relsak an nih hnuah Delhi-a Tihar Jail-ah khaihlum an ni.

Indira hi a pa, Jawaharlal Nehru dawtah India Prime Minister dinhmun chelh rei thei ber a ni. Kum 1966, January thla aṭang khan 1977, March thleng PM office a luah a, kum 1980, January 14 ah PM atan lakluh leh niin, a thih thlengin a chelh a ni.