Ramchhung Lawrkhawm

Diwali vangin Delhi khawpui boruak bawlhhlawh

Diwali lawmnaa halmawi leh halpuah an hal nasat avangin Delhi khawpui boruak a bawlhhlawh nasa hle a, nimin zinga khawpui chhunga pollution level tehnaah, mihring tana him tawk china nia bithliah aiin a let 13 zetin a sang. Khawpui chhung chu mei khuin a bawh nasa hle a ni. Delhi Pollution Control Committee (DPCC) leh Central Pollution Control Board (CPCB) in data an lakkhawmah, khawpui chhung hmun hrang hrang boruak hi a bawlhhlawh zual hle. Agency-te hian data hi an la lakhawm chhunzawm zel a, final report chu an website-ah an tarlang ang.

Data lakkhawm tawh aṭanga an tarlan danin, Anand Vihar (East Delhi), RK Puram (South Delhi) leh Punjabi Bagh (West Delhi)-ah chuan Pathianni zan khan boruak a bawlhhlawh zual a, pollution level hi a him tawk nia ngaih aiin 17 in a sang. Zan dar 9 aṭanga Thawhṭanni zing dar 3 thlengin boruak tibawlhhlawhtu hi a pung zual.

Pakistan sipaiten inremna palzut leh

Pakistan sipaite chuan International Border (IB)-a inkahhai puan chu palzut lehin, Pathianni zan khan Samba, Kathua leh Jammu district-a BSF post-te an kap a, India sipaiten an chhang let ve nghal. Pathianni zan aṭang khan IB-a RS Pura sector-ah sipaite hi inkapin, nimin zing thleng khan an inkap chhunzawm a ni. Suchetgarh biala Indian post-te chu Pakistan sipaite hian mortar shell hmangin an kap bawk. Ramri-a inkahna thleng vang hian thi leh hliam erawh an awm hriat a ni lo.

Kar kalta Zirtawpni khan Pakistan sipaiten Jammu, Kathua, Poonch leh Rajouri district-a LoC leh IB-a Indian post leh civil mite chenna an kah avangin civil mi pahnih an thi a, mi dang enge emaw zatin hliam an tuar. India sipaiten an kahletnaah Pakistan sipai 15 an kaphlum a ni.

Indian Army-te'n Pakistan ram chhunga firfiakte tawmbuk bei a, surgica strike an neih hnuah khan ramria inkahhai thuthlung siam chu ṭum 60 chuang zet palzut a ni tawh.

Khaw khenna state-ah Kerala puang

Kerala sorkar chuan an state chu khaw khenna state-ah a puang. State chhunga district 14-te chuan khawkheng vanga harsatna an tawh vek avangin, nimina state assembly inkhawmah Revenue Minister E Chandrasekheran chuan an state chu khaw kheng state-ah a puang ta a ni. Eptute pawhin minister thutlukna siam chu an thlawp thu an sawi a, khawkhenna state-ah puan an nih tak avangin state sorkar chuan sorkar laipui aṭanga ṭanpuina awm theite a hmuh theih dan tur a ngaihtuah a ngai tih an sawi.

Minister chuan June-September thla chhungin ruahtui mm 2,039 tal an hmuh a ngai tih a sawi a, mahse hemi chhunga ruahtui tla zat hi mm 1,352 chauh a ni a, ti. Hei vang hian state chunga tuikhuah hrang hranga tui te a tlem hle a, tuichhunchhuah eng emaw zat an kang tawh bawk a ni, a ti.