SIMI helte tlanchhuah dan chhui mek

Bhopal Central Jail aṭanga tlanchhuak, Students Islamic Movement of India (SIMI) helte tlanchhuah dan chu chhui chian mek a ni a, helho hian jail aṭanga an tlanchhuah dawn hian barrack kawngka hawnna atan toothbrush leh hmanraw dang an dawnte an hmang niin Madhya Pradesh Police-te'n an sawi.

SIMI hel pariatte hi an tlanchhuah hnuah police-te'n umzuiin an inkap zui a, an pariat hian kahhlum vek an ni. An inbeihnaah hian police pathumin hliam an tuar bawk. Helte kut aṭang hian tualchher pistol pali leh chem pathum an man.

Madhya Pradesh Police DGP Yogesh Chau≠dhary chuan SIMI hel pariat tlanchhuakte chu barrack pahniha awmte an nih thu leh, SIMI hel tang mek 29 zinga mi an nih thu a sawi. Toothbrush leh hmanraw dang an dawnte chu barrack kawngkhar hawnna atan hmangin, jail warden Ramashankar Yadav chu a nghawngah an zai a, jail staff dang Chandan Singh chuan an phuarbet bawk. Hemi hnu hian an mutpuan hmangin feet 25-a sang, tan-in bangah an uai liam a ni.

SIMI helte tlanchhuah dan hi National Investigaton Agency leh Intelligence Bureau chuan an chhui mek a, helho tlanchhuah lai hian jail chhunga CCTV camera-te chu a ṭha lo a, hei hi helho hian hriain an tlanchhuah theih phah nia sawi a ni. Jail aṭanga mi pariat an tlanchhuah avang hian jail official panga chu hrem an ni tawh.