Court-in school himna ngaihtuah turin J&K sorkar hriattir

Jammu and Kashmir-a tualchhung buaina a thlen hnuah, India aṭanga inlakhran duhtu pawlte chuan thla khat chhungin school 25 an hal tawh. Hei vang hian Jammu and Kashmir High court chuan state sorkar hnenah school hrang hrangte himna chu ngaihtuah turin a hriattir.

Thawhṭanni khan Kashmir Valley-a Anantnag district-a school pakhat chu hal a ni leh a, school building pawh a chhe nasa hle. He thil thleng hian mipuite a ti thinur tawh hle a ni.

J&K High Court chuan zirna in beih a, hal a ni ṭhin chu thil pawi tak a nih thu sawiin, official-te chu zirna in venhim a nih theih dan tur kawngte ngaihtuah turin a hrilh a, November 7-ah hemi chungchang hi ngaihtuah leh turin a dah.

Court chuan Chief Secretary leh Director General of Police hennah, district level officer-te hnenah hriattir pe a, school building-te hal an nih tawh lohna tur leh, beih an nih tawh lohna tura a ṭul anga hma la tura hrilh turin a ti. Hei bakah hian zirna in beitute chu man chhuak a, na taka rorel sak an nih tur thu a sawi bawk.

High Court chuan state sorkar pawh na taka khakin, state chhunga school building-te venhimna tur policy nei loah a puh a, school himna tur lam ngaihtuah aiin thildang a ngaihtuah a ni, a ti. Tualchhung mipuite chuan school building-te venhim an nih thehna tura thuneitute thawhpui turin an beisei thu a sawi.

Tualchhung mite chuan school building beih a nih ṭhin chungchangah, inlakhran duhtu pawl Hurriyat Conference chu mawhphurtuah an puh a, an pawl hian Taliban firfiak pawlte tihdan angin school-te chu hawng lo turin school thuneitute an vau niin an sawi.