Ramchhung Lawrkhawm

Myanmar-ah Navy hotu a zin

Navy chief Admiral Sunil Lanba chu ni li cham turin Thawhṭanni khan Myanmar ramah a zin a, a cham chhung hian Myanmar defence hotute kawmin, ram pahnih sipaiten thawhdunna ṭha an neih theih dan turte a sawipui ang.

Admiral Lanba hian Myanmar Vice President U Myint Swe, Win, Deputy Commander-in-Chief (Defence Forces) leh Commander-in-Chief, Myanmar Army Vice Senior General Soe Win leh, Commander-in-Chief, Myanmar Navy Admiral Tin Aung San-te a kawm dawn a ni. National Defence College zirlaite hmaah thu sawiin, Defence Services Academy, Naval Training Command leh Myanmar Navy Frigate UMS Aung Zeya-te a tlawh dawn bawk.

J&K ramria inkahnaah mi pakhat thi

Jammu and Kashmir-a Samba district-ah International Border-ah nimin khan Pakistan Ranger-te'n silai hmetpuak lehin, hmeichhe pakhat an kahhlum bakah mi dang pathumin hliam an tuar.

Police official-te chuan Pakistan sipaite hian Ramgarh sector-a civil mite chenna leh defence ho hmunte chu an pawng kah niin an sawi. Ramgarh bakah hian Arnia leh Naushera sector-te an bei tel bawk. September 29-a Indian army-te'n Pakistan ram chhunga firfiakte tawmbuk bei a, surgical strike an neih hnu khan Pakistan sipaite hian Line of Control-a ram pahnihte inkahhai an puan chu ṭum 60 chuang zet an palzut tawh a ni. Pakistan sipaite beihna avang hian mi 11 an thi tawh a, an zingah hian civl mi pathum an tel. Mi 40 chuangin hliam an tuar bawk.

Delhi khawpui boruak bawlhhlawh vangin high level meeting ko

Delhi Deputy Chief Minister Manish Sisodia chuan Diwali lawmnaa halmawi leh halpuah halin Delhi khawpui boruak nasa taka a tihbawlhhlawh vangin, hma lak dan tur ngaihtuahin nimin khan high level meeting a ko. Meeting hi Delhi Secretariat-ah neih a ni a, minister leh officer-te chuan khawpui boruak bawlhhlawh tihhniam a nih theih dan turte an sawiho a ni. Sisodia chuan khawpui chhung boruak bawlhhlawhna level sang zel chuan mihring hriselna lam thlengin nghawng pawi tak a nei tih a sawi.