OROP vangin sipai bang intihlum

Sipai bang Ram Kishan Garehwal chu Prime Minister Narendra Modi-a kaihhruai sorkar laipuiin sipai bangte pension scheme, One Rank One Pension (OROP) scheme a kalpui danah lungawi loin, minin khan a intihlum.

Ram Kishan Garehwal leh sipai bang ṭhenkhat chuan OROP scheme kaihhnawiha sipai bangte thil phut sorkarin a tihhlawhtlin loh avang≠in New Delhi-a Jantar Mantar-ah nawrh an huaihawt a ni. Garehwal hi Bhiwani, Haryana state a mi a ni a, Thawhlehni zan khan a chhungte chu biain, sorkarin an thil phut a tihhlawhtlin loh avangin a intihlum tur thu hi a hrilh a, a hnuah tur a in zui ta nia sawi a ni. Garehwal hi Ram Manohar Lal (RML) Hospital-ah kalpui nghal ni mah se, an chhan hman tawh lo a ni.

Kum 70 mi, Garehwal hian lehkha a hnutchhiah a, sipai bangte tana 6th leh 7th pay commission rawtna hman a nih ve loh avanga a lungawi loh thu a ziak. Sorkar chuan thu tam tak tiam mah se, sipai bangte pension pek dan dik tawk lo chu a siamṭha thei chuang lo niin a sawi a, a rank pui mi ṭhenkhat chuan amah aiin pension an la hnem hle niin a sawi. A thihna chuan sorkar laipui chu a tihharh theih a beisei thu a ziak bawk.

Police-te chuan Garehwal leh sipai bang ṭhenkhat chuan pension pek dan chungchanga an lungawi lohna thu hi Defence Ministry hnenah thlen an tum mek niin an sawi.

Delhi Police-te chuan damdawi-ina Garehwal-a chhungte hmuh tuma kal, Delhi Deputy Chief Minister Manish Sisodi leh Congress vice president Rahul Gandhi-te chu an luh phal loin an hreng zui. Anni bakah hian Garehwal-a chhungte pawh politician-te nen indawr a, hospital kawtah lungawi lohna an lantir avangin hren an ni bawk.