India enthlaknaah mi dang 16 inhnamhnawih

India enthla a, defence document leiruk avanga India ram aṭanga hnawhchhuak, Pakistan High Commission official Mehmood Akhtar chuan staff dang 16 an inhnamhnawih thu a sawi.

Delhi Police leh intelligence agency-te'n thu an zawhfiahnaah, Akhtar chuan Indian army leh Border Security Force kaihhnawih document pawimawh leiruknaah hian Pakistan High Commission-a thawk mi dang 16-te pawh an inrawlh nia a sawi thu police officer chuan a sawi. A thusawi hi finfiah tum mek a ni a, a dik a nih chuan police-te'n Ministry of Externatl Affairs-ah a ṭul anga hma la turin an ngen dawn a ni.

Crime Branch team chuan Akhtar-a hnena document hralh leh thuruk pawimawh hrilha puhte in chu an dap bawk. Akhtar-a hnena defence document hralhtua puha man, Maulana Ramzan, Subhash Jangir leh Shoaib-te hruaiin, Rajasthan-ah hian Crime Branch team pahnih an awm mek a, information a putruk chungchanga sipai inhnamhnawihte zawnchhuah tumin an bei mek a ni. Mi pahnihte chu man ni tawhin thu zawhfiah mek an ni.

Defence document ṭhenkhat putruk chungchangah hian sipai officer pension tawh inrawlh an awm rin a nih thu official-te chuan an sawi.