Udaipur-ah ruihhlo Rs vbch 3,000 hu man

Directorate of Revenue Intelligence (DRI) chuan Udaipur-a factory pakhatah ruihhlo, cheng vaibelchhe 3,000 hu an man a, he thila inhnamhnawih Bollywood producer Subash Dudhani an man tel bawk. Hei hi DRI-in ṭum khata ruihhlo an man tam ber ṭum a ni.

DRI official-te hian October 28 khan Udaipur-a Marudhar Drinks factory an dap a, room pakhata Mandrax tablet chhekkhawm chu an man ta a ni. CBEC chairperson Najih Shah chuan Mandrax tablet an man chu mum vaibelchhe hnih vel a nih thu leh, a rih zawng pawh metric ton 23.5 a tlin thu a sawi a, an damdawi man chu international market-ah cheng vaibelchhe 3,000 chuang man a nih thu a sawi.

Shah chuan an damdawi man cu Mandrax, M-Pills, buttons leh smarties tia sawi
ṭhin a nih thu leh, ganja nena an zuk pawlh ṭhin thu a sawi a, Africa leh Asia-ah an hmang uar niin a sawi bawk. Udaipur-a an man hi Rajasthan-a siam niin, Mozambique leh South Africa rama thawn chhuah tum a ni, a ti.