SIMI hel kahhlum an nih dan CBI chhuitir phut

Madhya Pradesh-a Bhopal Central Jail aṭanga tlanchhuak Student Islamic Movement of India (SIMI) hel pariatte kahhlum an nih dan chu Central Bureau of Investigation (CBI) chhui tir an phut tih an ukil Parvez Alam chuan a sawi.

SIMI hel pariatte hi jail aṭanga an tlanchhuah hnuah, Madhya Pradesh police-te chuan umzuiin, an vai hian an kaphlum a ni. Helho ukil, Parvez Alam chuan police-te'n jail aṭanga helho tlanchhuah dan an sawi, thing leh toothbrush hmanga kawngka hawng a, an puanphah hmanga jail banga an uai liam thu an sawi chu thil rinhlelhawm tak a ni, a ti. A hnuah helho an kahhlum dan chu chhui chian a ngai a ni tiin, police-te hian helte hian silaiin an lo kap let nia an sawi laiin, mi ṭhenkhat chuan hel ho hian ralthuam an nei lo niin an sawi thung.

Madhya Pradesh sorkar chuan jail aṭanga helho tlanchhuah dan hi National Investigation Agency-in a chhui dawn tih a sawi a, mahse police-te nen an inbeih zui dan erawh a chhui tel dawn lo tih a sawichiang nghal bawk.

Hetihlai hian National Human Rights Commission chuan video footage aṭanga a lan danin hel tlanchhuakte hi police-te hian hnai takah an kaphlum a, helho nen an an inkaplai a awm lo tih a sawi a, hemi chungchang hi sawifiah turin Madhya Pradesh sorkar a phut.