Ramchhung Lawrkhawm

MP-te hlawh 100% in tisang dawn

Parliament member-te chu an hlawh 100% a tihsan sak an ni dawn a, thla khata Rs 50,000 an lak ṭhin chu cheng nuai khatah tihpun rawt a ni. MP-te hlawh tihsanna tur bill hi Parliament thlasik ṭhutkhawmah pass hman beisei a ni.

Prime Minister Office (PMO) chuan Joint Committee on Salaries and Allowances of Members of Parliament-in hlawh tihsan a rawtna chu ngaihtuah a remtih tawh nia sawi a ni. PM hian MP-te thla hlawh bakah, an allowance pawh ennawn a tum a ni. Sorkar laipui chuan President hlawh, thla khata cheng nuai 1.5 chu cheng nuai 5 leh Governor hlawh thla khatah cheng nuai 1.10 chu cheng nuai 2.5-ah tihsan a lo rawt tawh bawk.

J&K sorkarin Jammu bialah school a khar tir

Jammu and Kashmir sorkar chuan Pakistan sipaiten ramria inkahhai thuthlung siam an palzut reng avangin Jammu biala International Border (IB) leh Line of Control (LoC) chhehvela school zawng zawng chu khar vek turin thupek a tichhuak.

Jammu biala ramri huam chinah hian school 174 a awm. July thlaa aṭnaga tualchhung buaina a thlen hnuah, India lak
aṭanga inlakhran duhtu pawlte chuan Kashmir Valley-ah school 25 chuang an hla tawh a, Thawhṭanni khan state high court chuan zirna-in hrang hrangte himna ngaihtuah turin state sorkar a hriattir a ni.

Indian Army-in Russian T-90 tank lei dawn

Indian Army chuan khawthlang lam, Pakistan ramri bula dah turin Russia aṭangin T-90 tank 464 lei a tum.

Russia aṭanga tank lei nana cheng vaibelchhe 13,448 contract an ziah turah hian Make in India kalpuina peng pakhat atan Chennai bul, Avadi-a Heavy Vehicles Factory dinna tur pawh a tel dawn a ni. T-90MS tank hi zan lamah pawh hmelmate hmun kap fuh theih tura thuam a ni ang. Sipaite hian T-90 hi regiment 18 a nei mek a, hengte Rajasthan leh Punjab-a Pakistan ramri bulah dah an ni.