PM Modi-a'n Canada zin pahin Cyprus leh Croatia tlawh dawn

Prime minister Narendra Modi chuan June 15-17 a Canada-a G-7 summit hmang tura a kal pahin Cyprus ram a tlawh pah dawn a, a haw lamah Croatia ram a tlawh bawk ang.

Cyprus leh Croatia ramte hi inlaichinna leh sumdawnna kawnga India tana ram pawimawh tak an ni. Cyprus hian Kashmir-a pawikhawihna thleng leh India chhan letna chungchangah India a thlawp tlat thu a lo tarlang tawh bawk. Prime minister hlui pahnih, Indira Gandhi leh Atal Bihari Vajpayee te pawhin an lo tlawh tawh a ni. Modi hian Cyprus president Nikos Christodoulides a hmu dawn a ni.

PM Modi-a'n Croatia a tlawh tur hi Indology zirna kalpui chawinunna tura tih nia sawi a ni bawk. University of Zagreb-ah Indology zirna hi kalpui a ni. Croatia leh India hian kum eng emaw zat liamta aṭanga hnam nunphung zir tawnna an lo nei tawh a, hei hian defence leh technology lamah thawh dunna pawh a siam chho bawk. Kum 2023-a Raisina Dialogue-ah khan Croatia foreign minister Gordan Grlic-Radman telin, external affairs minister S. Jaishankar nen defence lama thawh dunna tur memorandum of understanding an ziak.