Rahul-a'n PM hnenah lehkha thawn

Lok Sabha-a Leader of Opposition, Congress party hruaitu Rahul Gandhi chuan prime minister Narendra Modi lehkha thawnin Dalit, ST, EBC, OBC leh minority zirlaite residential hostel dinhmun chhe lutuk leh, heng zirlaite post-matric scholarship tih khawtlai sak chungchang chu ngaihtuah thuai turin a ngen.

Gandhi chuan zirlaite harsatna neih mek hi chinfel sak thuai a ṭul thu sawiin, hei hian marginalised community-a zirlai 90% vel a nghawng niin a talrang." Dalit, ST, EBC, OBC leh minority zirlaite residential hostel hi a chhe hle a ni. Tun hnaia Dharbanga, Bihar-a Ambedkar Hostel kan tlawh khan zirlaite chuang single room pawh mi 6-7 in inhmanṭawma ngaih thute an sawi a; inthiarna hmunte a ṭha loin tui thianghlim in tur a ṭha lo a, ei tur a ṭhat loh bakah library leh internet pawh hman tur a awm lo tih min hrilh a ni," a ti.

Hei bakah margi­nalised communities zirlai tana post-matric scholarship chu tih khawtlai fo leh pek chhuah lohte a ni tiin, kum thum chhung Bihar-ah hian scholarship portal a hman theih tawh loh bakah, 2021-22 zirlaiten scholarship hi an la lo bawk a ni, a ti. Hei bakah FY23-a Dalit zirlai zinga scholarshiop dawng nuai 1.36 chu FY24-ah nuai 0.69 an tlahniam, scholarshiop atana sum pek chhuah pawh a an ti hniam nasa tawh hle niin a sawi bawk.

Gandhi chuan Dalit, Scheduled Tribes (ST), Economically Backward Class (EBC), Other Backward Classes (OBC) leh minority communities zirlaite hostel tin chu enfiah ziah a, siamṭhat ngaite siamṭhat a nih theihna tura an mamawh ang fund pawh siamsak turin a phut bawk a ni. Post-matric scholarship chu a hun taka pe chhuak ṭhin tura ngenin, an sum pek pawh tih pung turin Congress hruiatu chuan a ngen bawk a ni.